سمنګان کې د اتو لوبډلو ترمنځ د واليبال سيالۍ پای ته ورسېدې
د سمنګان ولايت د بدني روزنې او ورزش امريت اړوند د واليبال ملي فدراسيون د استازولۍ له لوري د ياد امريت په ۵۰۰ کسيز جمنازيوم کې د اتو لوبډلو ترمنځ د واليبال سيالۍ پای ته ورسېدې.
د دغو سياليو په پايلوبه کې قندهاري لوبډلې خپلې سیالې فيضي لوبډلې ته د ۰/۳ ميدانونو په توپير ماتې ورکړه او اتلولي يې خپله کړه.
د يادو سياليو موخه د واليبال لوبو ته د ځوانانو هڅول، د غوره لوبغاړو موندل او له نشه يي توکو څخه د ځوانانو لېري والی و، چې درې اونۍ يې دوام وکړ.
د سياليو په پای کې د سمنګان ورزشي امريت له لوري غوره لوبډلې ته د اتلولۍ جام او غوره لوبغاړو ته ورزشي ډالۍ ورکړل شوې.
