ميدان وردگ؛ سيدآباد ولسوالۍ کې د ۴۲ لوبډلو ترمنځ د ټېپ بال کرکټ سيالۍ پای ته ورسېدې
د ميدان وردگ ولايت د بدني روزنې او ورزش آمريت اړوند د ټېپ بال کرکټ فدراسيون د استازولۍ له لوري د سيدآباد ولسوالۍ په هفت آسياب کلي کې د ۴۲ لوبډلو ترمنځ د ټېپ بال کرکټ سيالۍ، چې يوه اوونۍ مخکې پيل شوې وې د شش قلعه ځوانانو لوبډلې په اتلولۍ پای ته ورسېدې.
د يادو سياليو پايلوبه د شش قلعه ځوانانو او اتحاد ځوانانو لوبډلو ترمنځ ترسره شوه، د لوبې پچه شش قلعه ځوانانو لوبډلې وگټله او لومړی يې د توپ وهنې پریکړه وکړه، چې په ټاکلو پنځو اورونو کې يې د اووه لوبغاړو په سوځېدو سره سيالې لوبډلې ته د ۱۱۰ منډو هدف وټاکه، په مقابل کې اتفاق ځوانانو لوبډلې د ټولو اورونو په لوبولو سره ۶۹ منډې وکړې او لوبه يې د ۴۱ منډو په توپير وبايلله.
د ویلو وړ ده، چې د دغو سیالیو موخه ورزش ته د ځوانانو هڅول او د يادې ولسوالۍ وگړو لپاره د يوې سالمې تفريح برابرول وو.
