د ورزش ادارې عمومي رئیس د هرات د فدراسیونونو او ولسوالیو له ورزشي استازو سره ناسته وکړه
د المپيک، بدني روزنې او ورزش عمومي رئيس، مولوي احمدالله وثيق او ورسره مله پلاوي هرات ته د خپل سفر په ترڅ کې د دغه ولايت د فدراسيونونو او ولسوالیو له ورزشي استازو سره ناسته وکړه.
د دغې ناستې په پيل کې د هرات ولايت د بدني روزنې او ورزش رياست رئيس، مفتي عبدالرحيم رحماني مېلمنو ته د ښه راغلاست ترڅنګ وويل، موږ به خپل ټول شته امکانات د خپلو ورزشکارانو په خدمت کې مصرف کړو.
دغه راز د فدراسيونونو په استازولۍ احمد جاوېد رسولي د WTF فدراسیون استازي خبرې وکړې او وې ويل، د هېواد د ورزش ادارې د ځانګړې پاملرنې له امله د هرات ولايت په ورزش کې مثبت بدلون راغلی دی او زياته يې کړه، چې په دې وروستیو کې ورزشکارانو نوې انګېزه اخيستې او موږ ورزش ادارې ته پوره ډاډ ورکوو، چې د هېواد د ملي او ولايتي سياليو په جوړولو کې به هر ډول همکاري وکړو.
همدارنګه د ولسواليو د ورزشي استازو په استازیتوب بیا سيد تواب ګيلاني وويل، زموږ اکثره اتلان له ولسواليو څخه ولايتي سياليو او بیا نړیوالو سياليو ته لار مومي؛ نو د ولسواليو ورزش ته بايد لا زياته پاملرنه وشي او دې ورزشکارانو ته نورې اسانتياوې برابرې شي.
د ناستې په پای کې د هېواد ورزش ادارې عمومي رئيس ښاغلي احمدالله وثيق، د فدراسيونونو او ولسوالیو له ورزشي استازو څخه د مننې ترڅنګ وويل، په دې وروستيو کې د هېواد ورزش په ملي او نړيواله کچه زياته وده کړې ده او ښې لاسته راوړنې لري.
دغه راز نوموړي زياته کړه، چې د ورزشکارانو په دې لاسته راوړونو کې د فدراسيونونو او ولسوالیو د ورزشي استازو رول جوت دی، ځکه، همدوی دي، چې ورزشکاران روزي او بیا هغوی په ملي او نړيواله کچه مډالونه ګټي. ښاغلي وثیق یو ځل بیا ټولو ورزشکارانو او د ورزشي فدراسیونونو استازو ته ډاډ ورکړ، چې د ورزش ادارې په واک کې ټول شته امکانات به د ورزش د ودې لپاره کارول کیږي.
