کابل ښار کې د ۲۰۰ ورزشکارانو ترمنځ د ووشو د استعداد موندنې سيالۍ پای ته ورسېدې
د المپیک، بدني روزنې او ورزش عمومي رياست اړوند د ووشو ملي فدراسيون له لوري د ياد رياست په ووشو جمنازيوم کې د کابل ښار له ۳۰ کلبونو د ۲۰۰ ورزشکارانو ترمنځ د ووشو د استعداد موندنې سيالۍ، چې دوې ورځې مخکې پیل شوې وې د ۴۰ غوره ورزشکارانو په ټاکلو پای ته ورسېدې.
دغه سيالۍ د تنکيو ځوانانو، نويو ځوانانو، ځوانانو او د لويانو ورزشکارانو په عمري کټګوريو کې ترسره شوې، په پايله ۴۰ غوره ورزشکاران وټاکل شول، چې ټاکل شوي ورزشکاران به د کابل ښار د ووشو منتخبو سياليو کې هم ګډون وکړي.
د دغو سياليو د پای په مراسمو کې د المپيک، بدني روزنې او ورزش عمومي رياست ورزشي مشاور قاري حيات الله رحماني، د ووشو ملي فدراسیون رهبري، ورزشکارانو او زيات شمېر مينوالو ګډون کړی وو.
د يادو سياليو موخه د کابل ښار ووشو منتخبو سياليو ته د غوره ورزشکارانو موندل او ورزشي استعدادونو ته وده ورکول و.
