کابل کې د ۶ لوبډلو ترمنځ د هنډبال ۳۱م پړاو ټاکنيزې سيالۍ پيل شوې
د المپيک، بدني روزنې او ورزش عمومي رياست اړوند د هنډبال ملي فداسیون له لوري د کابل ولايت د ۶ لوبډلو ترمنځ د دې رياست په ۵۰۰ کسيز جمنازيوم کې د هنډبال ۳۱م پړاو ټاکنيزې سيالۍ پيل شوې.
په دغه سياليو کې به شپږ لوبډلې ( هدايت کلب، معارف، جوانان کابل، کامه کلب، پولي تخنيک کلب او کابل کلب) په دوو ګروپونو کې د يو بل پر وړاندې د لوبې ډګر ته ښکته شي، چې په پايله کې به يې دوه پياوړې لوبډلې د کابل منتخبو لوبډلو په توګه غوره شي.
د دې سیالیو پيليزه لوبه د کابل کلب او کابل پولي تخنيک لوبډلو ترمنځ ترسره شوه، چې په پايله کې يې کابل کلب خپلې سيالې کابل پولي تخنیک کلب لوبډلې ته د ۲۷ ـ ۱۹ ګولونو په توپير ماته ورکړه او لومړۍ بريا يې په خپل نوم کړه.
د يادونې وړ ده، چې دغه سیالۍ د کابل لپاره د دوه منتخبو لوبډلو ټاکلو په موخه پيل شوې، تر څو د ملي لوبډلې په راتلونکو ټاکنيزو سياليو کې د کابل په استازولۍ ګډون وکړي، چې درې ورځې به دوام وکړي.
