د المپيک بدني روزنې او ورزش عمومي رييس بغلان ولايت ته د سفر په دوام د ښوونځيو ترمنځ د فوټسال سياليو پرانيسته وکړه
د المپيک بدني روزنې او ورزش عمومي رييس مولوي احمدالله وثيق، بغلان ولايت ته د خپل سفر په دوام د ياد ولايت د مرکز پلخمري د ۲۰ دولتي او خصوصي ښوونځيو د لوبډلو ترمنځ د فوټسال سياليو پرانيسته وکړه.
د دغو سياليو د پيل په مراسمو کې د المپيک، بدني روزنې او ورزش عمومي رييس مولوي احمدالله وثيق د ښوونځيو زده کوونکو ته ښه راغلاست ووايه او دوی يې د وطن د ښه راتلونکي اتلان ياد کړل. ښاغلي وثيق وويل: تاسو ځوانان به نه يوازې د وطن په رغوونه کې مثبت ګامونه واخلئ؛ بلکې په ورزشي ډګر کې به هم تاسو وطنوالو ته مډالونه راوړئ او د وطنوالو د خوښۍ سبب به جوړېږئ.
ورپسې د دغو سياليو لومړۍ لوبه وشوه، چې په پايله کې خواجه کمال ولي لېسې لوبډلې پارک شمرق لېسې لوبډلې ته د ۴-۳ ګولونو په توپير ماتې ورکړه او بريا يې خپله کړه.
دغه سيالۍ چې ۲۵ ورځې به دوام وکړي، د مرکز پلخمري د ۲۰ ښوونځيو د لوبډلو ترمنځ ترسره کېږي.
