د المپيک بدني روزنې او ورزش عمومي رييس د بغلان ولايت د وزلوبې له پهلوانانو او اس لرونکو سره وليدل
د المپيک بدني روزنې او ورزش عمومي رييس او ورسره پلاوي، د ياد ولايت د وزلوبې له پهلوانانو، اس لرونکو او مينوالو سره ولیدل او د دغه ورزش د لا غوړېدا او ودې په موخه متقابل نظرونه وړاندې شول.
په دغه ناسته کې د ورزش ادارې رهبري پلاوي، ياد ولايت ورزشي امر، د مرکز پلخمري او ولسواليو پهلوانانو، اس لرونکو او د وزلوبې مينوالو ګډون کړی وو.
د هېواد د ورزش ادارې عمومي رييس مولوي احمدالله وثيق له ګډونوالو وغوښتل، چې د وزلوبې ورزش په برخه کې فعاله ونډه واخلي، يووالي ته کار ووايي او هېڅوک پرې نه ږدي، چې د دغه ورزش په برخه کې ستونزې رامنځته کړي او ياده برخه زيانمنه کړي.
دا په داسې حال کې ده، چې د هېواد د ورزش ادارې رهبري پلاوي، شمالي ولايتونو ته د ورزشي ادارو د ارزونې په موخه تېره ورځې سفر پيل کړی او له څو ولایتونو به ليدنې وکړي.
