د پهلوانۍ ملي فدراسيون ۱۲ کسيزه لوبډله د تختي جام نړيوالو سیالیو کې د گډون په موخه ايران ته روانه شوه
د المپیک، بدني روزنې او ورزش عمومي رياست په همکارۍ د پهلوانۍ ملي فدراسيون ۱۲ کسيزه لوبډله د تختي جام په ۴۵م پړاو نړيوالو سياليو کې د گډون په موخه د ايران اصفهان ښار ته روانه شوه.
يادې سيالۍ، چې د لويانو په عمري او بېلابېلو وزني کټگوريو کې ترسره کېږي، د افغانستان سربيره د ايران، روسيې، ترکيې، هندوستان، ترکمنستان، قرغيزستان، عراق، هالنډ او آذربايجان هېوادونو ورزشکاران هم پکې گډون کوي.
دا سیالۍ به د روانې ثور میاشتې پر ۱۷مه نيټه پيل او د همدې مياشتې تر ۲۰مې نيټې پورې دوام وکړي.
د یادولو وړ ده، چې د مخه ښې په مراسمو کې د هېواد د ورزش ادارې عمومي رييس مولوي احمد الله وثيق، د المپيکي چارو رييس داد محمد پاينده اختري، ورزشي سلاکار قاري حيات الله رحماني، د پهلوانۍ ملي فدراسيون رهبري پلاوي او ورزشکارانو گډون کړی وو.
