پکتيکا؛ په يحی خېلو ولسوالۍ کې د ۴۰ لوبډلو ترمنځ د ټېپ بال کرکټ سيالۍ پای ته ورسېدې
د پکتيکا ولايت د بدني روزنې او ورزش امريت اړوند د ټېپ بال کرکټ فدراسيون د استازولۍ له لوري په یحی خېلو ولسوالۍ کې د ۴۰ لوبډلو ترمنځ د ټېپ بال کرکټ سيالۍ، چې ۱۱ ورځې وړاندې پيل شوې وې، د برات خېلو لوبډلې په اتلولۍ پای ته ورسېدې.
د دغو سياليو پايلوبه د برات خېلو او یحی خېلو لوبډلو ترمنځ وشوه، لومړی توپوهنه برات خېلو لوبډلې وکړه او په ټاکلو شپږو اورونو کې يې د درېوو لوبغاړو په زيان خپلې سيالې لوبډلې ته ۱۳۹ منډې هدف کېښود، د لوبې په دويمه پاڼۍ کې یحی خېلو لوبډلې د ټولو لوبغاړو په زيان ۹۴ منډې وکړې او په ۴۵ منډو يې ماتې وخوړه.
هېره دې نه وي چې د دغو سياليو موخه د ځوانانو ترمنځ د يووالي فضا برابرول او ورزش ته د ځوانانو هڅول ياد شوي دي.
