هلمند؛ مرکز لښکرګاه ښار کې د ٤٨ لوبډلو ترمنځ د ټېپ بال کرېکټ سیالۍ پای ته ورسېدې
د هلمند ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت مرکز لښکرګاه ښار کې د ٤٨ لوبډلو ترمنځ د ټېپ بال کرېکټ سیالۍ د پوپل او ورونو لوبډلې په اتلولي پای ته ورسېدې.
د یادو سیالیو پایلوبه د پوپل او ورونو او بېنوا لوبډلو ترمنځ ترسره شوه. د لوبې پچه پوپل او ورونو لوبډلې وګټله او لومړی یې توپوهنه وکړه، چې په ټاکلو لسو اورونو کې یې خپلې سیالې لوبډلې ته د ١٦١ منډو هدف وټاکه. بېنوا لوبډلې د هدف په تعقیب کې ١٠٠ منډې وکړې او د ٦٠ منډو په توپیر یې لوبه وبایلله.
دا سیالۍ ورزش ته د ځوانانو د هڅولو په موخه ترسره شوې، چې یوه میاشت یې دوام وکړ.
