هلمند؛ مرکز لښکرګاه کې د ۱۲ لوبډلو ترمنځ د فوټبال سیالۍ پای ته ورسېدې
د هلمند ولایت د بدني روزنې او ورزش امريت اړوند د فوټبال فدراسیون د استازولۍ له لوري د یاد ولایت په مرکز لښکرګاه کې د ۱۲ سي لوبډلو ترمنځ د فوټبال ګروپي سيالۍ، چې يوه مياشت مخکې پيل شوې وې د زرغون کلي لوبډلې په اتلولۍ پای ته ورسېدې.
د دغو سياليو په پایلوبه کې د زرغون کلي لوبډلې خپلې سيالې نوي فولاد لوبډلې ته د ۳/۱ ګولونو په توپير سره ماتې ورکړه او اتلولي يې وګټله.
دغو سياليو کې قاری عنايت الله غوره لوبغاړی، قدرت الله غوره ګول ساتونکی او نظرمحمد غوره ګول وهونکی و نومول شول او د ډاليو ګټونکي شول.
د يادو سياليو موخه د فوټبال ورزش ته د ځوانانو هڅول و.
