خوست؛ نادرشاه کوټ ولسوالۍ کې د شپږو لوبډلو ترمنځ د فوټبال سیالۍ پای ته ورسېدې
د خوست ولایت د بدني روزنې او ورزش آمریت اړوند د فوټبال فدراسیون د استازولۍ له لوري د ياد ولايت په نادرشاه کوټ ولسوالۍ کې د شپږو لوبډلو ترمنځ د فوټبال سیالۍ د نقیب الله لوبډلې په اتلولي پای ته ورسېدې.
د دغو سیالیو پایلوبه د نقیب الله او اکبري لوبډلو ترمنځ ترسره شوه، چې په پایله کې یې نقیب الله لوبډلې د ٣/٢ ګولونو په توپیر خپلې سیالې لوبډلې ته ماتې ورکړه او اتلولي یې وګټله.
دا سیالۍ ورزش ته د ځوانانو د هڅولو په موخه پیل شوې وې، چې یوه میاشت یې دوام وکړ او په پای کې غوره لوبغاړو ته مډالونه او نورې ډالۍ ورکړل شوې.
