کونړ کې د شپږو لوبډلو ترمنځ د ټېپ بال کرېکټ سیالۍ پیل شوې
د کونړ ولایت د بدني روزنې او ورزش آمریت اړوند د ټېپ بال کرېکټ فدراسیون د استازولۍ له لوري د ياد ولايت مرکز اسعد آباد ښار اړوند څاګي سیمه کې د شپږو لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د ماموندزي او چلینجر لوبډلو ترمنځ ترسره شوه. د لوبې پچه ماموندزي لوبډلې وګټله او لومړی یې توپوهنه وکړه، چې په ټاکلو اوو اورونو کې یې د اوو ویکټو په زیان خپلې سیالې لوبډلې ته د ٥٨ منډو هدف وټاکه. چلینجر لوبډلې ټاکلی هدف د لوبې پهٔ وروستي اور کې د نهو ویکټو په زیان په پوره کړ او د یوې ویکټې په توپیر یې د دغو سیالیو لومړۍ بریا خپله کړه.
دا سیالۍ د ځوانانو ترمنځ د یووالي په موخه پیل شوي دي، چې دولس ورځې به دوام وکړي.
