کونړ؛ کوز څاگي اتلانو لوبډلې د تنکيو ځوانانو د فوټسال ليگ اتلولي وگټله
د کونړ ولايت د بدني روزنې او ورزش آمريت اړوند د فوټبال فدراسيون د استازولۍ له لوري د مرکز اسعداباد ښار په څاگي سيمه کې د شپږو لوبډلو ترمنځ د تنکيو ځوانانو د فوټسال ليگ سيالۍ د کوز څاگي اتلانو لوبډلې په اتلولۍ پای ته ورسېدې.
د دغو سياليو په پايلوبه کې کوز څاکي اتلانو لوبډلې خپلې سيالې تور بازانو لوبډلې ته د ۰/۱ گول په توپير ماتې ورکړه او اتلولي يې وگټله.
د ويلو وړ ده، چې يادو سياليو لس ورځې دوام وکړ او په پای کې د ياد ولايت د ورزش آمريت له لوري اتلې لوبډلې ته د اتلولۍ جام او غوره لوبغاړو ته چمتو شوې ډالۍ ورکړل شوې.
