کونړ؛ وټه پور ولسوالۍ کې د ١۵ لوبډلو ترمنځ د ټېپ بال کرېکټ سیالۍ پیل شوې
د کونړ ولایت د بدني روزنې او ورزش امریت اړوند د ټېپ بال کرېکټ فدراسیون د استازولۍ له لوري د ياد ولايت په وټه پور ولسوالۍ کې د ١٥ لوبډلو ترمنځ د ټېپ بال کرېکټ سیالۍ پیل شوې.
د یادو سیالیو لومړۍ لوبه د آصف الله او هشام لوبډلو ترمنځ ترسره شوه. د لوبې پچه آصف الله لوبډلې وګټله او لومړی یې توپوهنه وکړه، چې په ټاکلو لسو اورونو کې یې د درېوو ویکټو په زیان خپلې سیالې لوبډلې ته د ١٥٣ منډو هدف وټاکه. هشام لوبډلې ټاکلی هدف د لوبې په نهم اور کې د یوې ویکټې په زیان پوره کړ او د نهو ویکټو په توپیر یې د دغو سیالیو لومړۍ لوبه وګټله.
دا سیالۍ د ځوانانو ترمنځ د یووالي په موخه پیل شوي دي، چې شل ورځې به دوام وکړي.
