کونړ؛ مرکز کې د څلورو لوبډلو ترمنځ د ټېپ بال کرکټ سیالۍ پای ته ورسېدې
د کونړ ولایت د بدني روزنې او ورزش آمریت اړوند د ټېپ بال کرکټ فدراسیون د استازولي له لوري او د یونیسیف مؤسسې په مالي ملاتړ د ياد ولايت مرکز اړوند څاګي سیمه کې د څلورو لوبډلو ترمنځ د ټېپ بال کرکټ سیالۍ د شاهین لوبډلې په اتلولي پای ته ورسېدې.
د یادو سیالیو پایلوبه د دم کلي ټایګر او کرهالې شاهین لوبډلو ترمنځ ترسره شوه. د لوبې پچه د دم کلي لوبډلې وګټله او لومړی یې توپ وهنه وکړه چې په ټاکلو لسو اورونو کې یې د خپلو شپږو لوبغاړو په له لاسه ورکولو سره خپلې سیالې لوبډلې ته د ١٠٦ منډو هدف وټاکه. کرهالې شاهین لوبډلې ټاکل شوی هدف د درېیوو لوبغاړو په له لاسه ورکولو سره د لوبې په وروستي اور کې ترلاسه کړه او د اوو ویکټو په توپیر یې د یادو سیالیو اتلولي وګټله.
دغه سيالۍ ورزش ته د ځوانانو د هڅولو په موخه ترسره شوې چې دوې ورځې یې دوام وکړ او په پای کې غوره لوبغاړو ته ټاکل شوې ډالۍ ورکړل شوې.
