کونړ؛ د واليبال سيريزد سادات خيريه بنسټ لوبډلې په ګټه پاى ته ورسېد
د کونړ ولايت بدني روزنې او ورزش امريت په مرسته د الزهرا خصوصي لېسې په ورزشي ميدان کې د الزهرا خصوصي لېسې او سادات خيريه بنسټ لوبډلو ترمنځ د واليبال سيريز او دوستانه لوبې د سادات خيريه بنست لوبډلې په ګټه پاى ته ورسېدې.
دغه سيريز، چې درې ورځې يې دوام وکړ، په پايلوبه کې د سادات خيريه بنسټ ٣-٢ پايلې سره د الزهرا خصوصي لېسې لوبډلې ته ماتې ورکړه او د دې سيريز اتلولي يې خپله کړه.
د دغو سياليو د پاى په مراسمو کې د الزهرا خصوصي لېسې مدير سيد جمالدين سعيد او د ورزش امريت مسوولينو زده کوونکو ته د ورزش په ګټو او اهميت خبرې وکړې او په هره برخه کې يې د همکارۍ ډاډ ورکړ.
په پاى د ورزش امريت له لوري ګټونکې لوبډلې ته د لومړي مقام کپ او الزهرا لېسې لوبډلې ته د دويم مقام کپ ورکړل شو.
