کندهار کې د ښوونځیو ترمنځ دودیزې لوبې پیل شوې
د کندهار ولایت د بدني روزنې او ورزش ریاست اړوند د ملي او دودیزو لوبو د مدیریت له لوري د یاد ولایت په ښوونځیو کې دودیزې لوبې پیل شوې.
په دغو لوبو کې رسۍ کشول، تیږه اچول او لاس چپه کول شامل دي، چې د روان ښوونیز کال تر پایه پورې به دوام وکړي.
د دغو لوبو د پیل په مراسمو کې د کندهار ولایت د ملي او دودیزو لوبو مدیر، ورزشي مسؤولانو، ګڼ شمېر لوبغاړو او زده کوونکو ګډون کړی و.
د یادو سیالیو موخه د دودیزو لوبو پرمختګ، د زده کوونکو او ورزشکارانو هڅوونه او د نویو لوبغاړو موندل ښودل شوي دي.
د نن ورځې لوبو د پای په مراسمو کې ټولو ګټونکو لوبغاړو ته مډالونه او ډالۍ ورکړل شوې.
