کندهار؛ د المپيک ملي کمېټې او سپورټ عمومي رئيس د کندهار ولايت له ورزشي مسوولینو سره وکتل
د هېواد د المپيک ملي کمېټې او سپورټ عمومي رئيس مولوي احمد الله وثيق او ورسره مل پلاوي کندهار ولايت ته د رسمي سفر په ترڅ کې د دې ولايت د ورزش رياست له مسوولینو او د فدراسيونونو له استازو سره وکتل.
په پيل کې د کندهار ولايت د ورزش ادارې مسوولينو کندهار ورزش ریاست ته د ښاغلي وثيق له راتګ څخه مننه وکړه.
ورپسې د المپيک ملي کمېټې او سپورټ عمومي رئيس مولوي احمد الله وثيق خبرې وکړې نوموړي د کندهار ولايت د ورزش له مسوولينو څخه مننه وکړه، چې په دې ولايت کې يې د ورزش د پراختیا او ورزشکارانو ته د ورزشي اسانتیاوو په برخه کې هلې ـ ځلې کړې دي.
ښاغلي وثيق په خپلو کې د کندهار ولايت ورزشي فعالیتونه ښه وبلل په خبره يې: دا مهال په کندهار کې ورزش د پام وړ پرمختګ کړى او ورزشي فعالیتونه تر پخوا ښه شوي دي او ورزشکارانو ته د ورزش کولو ښه امکانات برابري شوي دي.
ورپسې د کندهار د ورزش رئیس محمد اغا بشر خبرې وکړې نوموړي کندهار ته د ورزش ادارې عمومي رئيس د ورتګ هر کلى وکړ، نوموړي د ورزشکارانو د لا زيات ملاتړ په موخه د ځانګړې بوديجې، د فدراسيونونو د ستونزو د حل لپاره د ځانکړې پاملرنې او په کندهار کې د ورزش د لا پراختیا لپاره د همکارۍ غوښتنه وکړه، چې د ورزش ادارې د رئیس ښاغلي وثيق له لوري د پوره همکارۍ ډاډ ورکړل شو.
په دې ليدنه کې د کندهار ورزشي فدراسیونونو مسوولینو له احمدالله وثيق سره خپلې غوښتنې شريکي کړلې، چې په کندهار کې د يو باب جمنازيوم جوړول او د کندهار د ورزش رياست بوديجې زياتول پکې شامل و، چې د ورزش ادارې عمومي رئيس مولوي احمد الله وثيق له لوري د خپل توان مطابق د دوى د غوښتنو د حل ډاډ ورکړل شو.
