کندهار؛ اکبري لوبډلې د دويم رمضان جام په نوم د فوټسال سياليو اتلولي وگټله
د کندهار ولايت د بدني روزنې او ورزش رياست له لوري په کندهار ورزشي جمنازيوم کې د ۲۴ لوبډلو ترمنځ د دويم رمضان جام په نوم د فوټسال سيالۍ د اکبري لوبډلې په اتلولۍ پای ته ورسېدې.
د يادو سياليو پايلوبه د اکبري او معراج لوبډلو ترمنځ ترسره شوه، چې سيالۍ په ټاکلي وخت ۵/۵ مساوي پای ته ورسېده، خو په پنالټيانو کې اکبري لوبډلې سيالې معراج لوبډلې ته ۵/۶ گولونو په توپير ماتې ورکړه او اتلولي يې خپله کړه.
د يادونې وړ ده، چې په پای کې لومړي او دويم مقام گټونکو لوبډلو ته کپونه او غوره لوبغاړو ته بېلابېلې چمتو شوې ډالۍ ورکړل شوې.
