کندهار؛ اتفاق خانزاده لوبډلې د اتلانو فوټبال ليگ سياليو اتلولي وگټله
د کندهار ولايت د بدني روزنې او ورزش رياست او د فوټبال ملي فدراسیون په گډه همکارۍ او د روشن مخابراتي شرکت په مالي ملاتړ د ياد ولايت په مرکز احمد شاهي لوبغالي کې د پنځو ولايتونو ترمنځ د سويل لويديځ زون په کچه د اتلانو فوټبال ليگ سيالۍ د کندهار اتفاق خانزاده لوبډلې په اتلولۍ پای ته ورسېدې.
په يادو سیالیو کې د هلمند بارک، غزني پيروزي، ارزگان ځوانانو، زابل نويو ځوانانو او کوربه کندهار اتفاق خانزاده لوبډلو گډون کړی وو، چې په پايلوبه کې کندهار اتفاق خانزاده لوبډلې خپلې سيالې غزني پيروزي لوبډلې ته د ۱/۴ گولونو په توپير ماتې ورکړه او اتلولي يې وگټله.
د ويلو وړ ده، چې دغو سیالیو پنځه ورځې دوام وکړ او په پای کې اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
