کندز کې د شپږو لوبډلو ترمنځ د فوټبال سیالۍ پای ته ورسېدې
د کندز ولایت د بدني روزنې او ورزش ریاست اړوند د فوټبال فدراسیون د استازولۍ له لوري د یاد ولایت مرکز اړوند سپین زر ورزشي لوبغالي کې د هېواد د شپږو زونونو په کچه د شپږو لوبډلو ترمنځ د فوټبال سیالۍ د کندهار اتفاق خانزاده لوبډلې په اتلولي پای ته ورسېدې.
د یادو سیالیو په پای کې د کندهار اتفاق خانزاده لوبډلې د ۱۱ نمرو په ترلاسه کولو سره لومړی، کندز پیروزي لوبډلې د ۱۰ نمرو په ترلاسه کولو سره دویم او هرات شمس کولا لوبډلې د ۹ نمرو په ترلاسه کولو سره بیا درېیم مقام خپل کړ.
د یادو سیالیو د پای په مراسمو کې د المپیک، بدني روزنې او ورزش فني او مسلکي مرستیال حافظ احمدجان ځدراڼ، د فوټبال ملي فدراسیون رئیس محمد یوسف کارګر، د کندز ولایت ورزشي مسؤولانو، د کندز ولایت ولایتي چارواکو، ځوانانو او د ورزش ګڼو مینوالو ګډون کړی و.
دا سیالۍ د ځوانانو ترمنځ د یووالي او سالمې تفرېح برابرولو په موخه ترسره شوې، چې لس ورځې یې دوام وکړ.
