کندز؛ قلعه ذال ولسوالۍ کې د ١١ لوبډلو ترمنځ د والیبال سیالۍ پای ته ورسېدې
د کندز ولایت د بدني روزنې او ورزش ریاست اړوند د والیبال فدراسیون د استازولي له لوري د ياد ولايت په قلعه ذال ولسوالۍ کې د ١١ لوبډلو ترمنځ د والیبال سیالۍ د اسحاق لوبډلې په اتلولي پای ته ورسېدې.
په دغو سیالیو کې پر کندز سربېره د بلخ او جوزجان ولایتونو لوبډلو هم ګډون کړی و، چې پایلوبه یې د اسحاق او خبیب لوبډلو ترمنځ ترسره شوه او په پایله کې د اسحاق لوبډلې د ٢٥ پر ١٩ نمرو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
دا سیالۍ د والیبال لوبې ته د ودې ورکولو په موخه ترسره شوې چې یوه ورځ یې دوام وکړ او په پای کې اتلې لوبډلې ١٥٠ امریکايي ډالره او یو پسه او دویم مقام لوبډلې ته ١٠٠ امريکايي ډالره او یوه غالۍ د ډالۍ په توګه ورکړل شول.
