کندز؛ د اووه ولايتونو ورزشکارانو ترمنځ د ووشو ساندا او سانداوانګ سبکونو سيالۍ ترسره شوې
د کندز ولایت په کوربتوب د دې ولايت د ورزش ریاست په مرسته د ووشو فدراسیون له لوري د "شهيد استاد ذبيح الله کوهي" جام په نوم د کندز، ننګرهار، پنجشېر، بلخ، سرپل، کابل او تخار ولايتونو د ورزشکارانو ترمنځ د ووشو ساندا او ساندا وانګ درېيم پړاو سيالۍ ترسره شوې.
په دغو سياليو کې د يادو ولايتونو په نوي ځوانانو، ځوانانو او لويانو سني کټګوريو کې ٧٠ تنه ورزشکاران له يو بل سره ولوبېدل.
د يادو سياليو موخه د ووشو ورزشي رشتې وده او پرمختګ دى.
په پای کې د کندز ورزش ریاست له لوري غوره ورزشکارانو ته تقدير نامې، مډالونه او له کابل څخه د راغلي پلاوي له لوري د کندز ورزش رياست مسوولينو ته ورزشي وسايل هم ورکړل.
