کندز؛ امام صاحب ولسوالۍ کې د ۱۲ لوبډلو ترمنځ د واليبال سيالۍ ترسره شوې
د کندز ولايت د بدني روزنې او ورزش رياست اړوند د واليبال ملي فدراسيون د استازولۍ له لوري د ياد ولايت د امام صاحب ولسوالۍ په اق مسجد سیمه کې د ۱۲ لوبډلو ترمنځ د واليبال سيالۍ ترسره شوې.
د دغو سياليو په پايلوبه کې ايسکي لوبډلې خپلې سیالې چهار شنګي لوبډلې ته د ۱۸/۱۶ امتيازونو په توپير ماتې ورکړه او اتلولي يې خپله کړه.
د يادو سياليو موخه د واليبال ورزش ته وده ورکول او د ځوانانو ترمنځ يووالی رامنځته کول و، چې يوه ورځ يې دوام وکړ.
