کندز؛ امام صاحب ولسوالۍ کې د اتو لوبډلو ترمنځ د واليبال سيالۍ پای ته ورسېدې
د کندز ولایت د بدني روزنې او ورزش رياست اړوند د واليبال فدراسيون د استازولۍ له لوري د ياد ولايت په امام صاحب ولسوالۍ کې د اتو لوبډلو ترمنځ د واليبال سيالۍ، چې يوه شپه يې دوام وکړ د موج های آمو لوبډلې په اتلولۍ پای ته ورسېدې.
په يادو سیالیو کې د کندز ولایت پر لوبډلو سربېره د تخار ولايت له خواجه غار ولسوالۍ څخه يوې لوبډلې گډون کړی و، چې په پايلوبه کې موج های آمو لوبډلې خپلې سيالې کندز مرکز لوبډلې ته د ۳۱ پر ۲۴ امتيازونو په توپير ماتې ورکړه او اتلولي يې په خپل نوم کړه.
د ويلو وړ ده، چې د دغو سیالیو موخه ورزش ته د ځوانانو هڅول او د لوبغاړو جسمي او فکري وړتياوو لوړول وو.
