کندز؛ آمو فوټسال لوبغالي کې د ۴۴ لوبډلو ترمنځ د فوټسال درې ټورنمنټونه پای ته ورسېدل
د کندز ولايت د بدني روزنې او ورزش رياست اړوند د فوټبال فدراسيون د استازولۍ او د فوټسال ورزشي کمېټې له لوري د کندز ښار په آمو فوټسال لوبغالي کې د ۴۴ لوبډلو ترمنځ د فوټسال درې ټورنمنټونه پای ته ورسېدل.
په دغو سياليو کې د الف گروپ ۲۴ لوبډلې، د غوره ليگ لس لوبډلې او د لوړ عمر لرونکو اتو لوبډلو گډون درلود.
د يادو سياليو په پايلوبو کې الف گروپ نه ستاره های سادات لوبډلې خپلې سيالې آريانا لوبډلې ته ۳/۴ گولونو په توپير ماتې ورکړه، د غوره ليگ سياليو کې سره مياشت لوبډلې سيالې ستاره های سادات لوبډلې ته ۲/۵ گولونو په توپير ماتې ورکړه او همدرانگه د لوړ عمر لرونکو سياليو کې بيا پيام حدت لوبډلې خپلې سيالې افغان لوبډلې ته ۱/۸ گولونو په توپير ماتې ورکړه او اتلولي يې خپله کړه.
د دغو سياليو د ترسره کېدو موخه د ياد ولايت په کچه د فوټسال لوبغاړو د وړتياوو لوړول ياد شوي وو، چې شاوخوا يوه مياشت يې دوام وکړ او په پای کې گټونکو لوبډلو ته د اتلولۍ جامونه او غوره لوبغاړو ته مډالونه ورکړل شول.
