کندز؛ آسيا گروپ لوبډلې د امام صاحب ولسوالۍ د فوټبال غوره ليگ سياليو اتلولي خپله کړه
د کندز ولايت د بدني روزنې او ورزش رياست اړوند د فوټبال فدراسيون د استازولۍ له لوري د امام صاحب ولسوالۍ په خورشيد لوبغالي کې د ۱۱ لوبډلو ترمنځ د فوټبال غوره ليگ سيالۍ، چې درې مياشتې مخکې پيل شوې وې، د آسيا گروپ لوبډلې په اتلولۍ پای ته ورسېدې.
د يادو سياليو په پايلوبه کې آسيا گروپ لوبډلې خپلې سيالې صبح صادق لوبډلې ته د ۲ پر صفر گولونو په توپير ماتې ورکړه او اتلولي يې خپله کړه.
د يادونې وړ ده، چې د دغو سياليو د ترسره کېدو موخه د امام صاحب ولسوالۍ په کچه د غوره لوبغاړو موندل وو.
