کاپیسا؛ د کوهستان په حصه دو ولسوالۍ کې د ۵۰ ورزشکارانو ترمنځ د کیوکوشن کراټې سیالۍ ترسره شوې
د کاپيسا ولایت د بدني روزنې او ورزش امریت اړوند د کیوکوشن کراټې ملي فدراسیون د استازولۍ له لوري د یاد ولایت د کوهستان حصه دو ولسوالۍ کې د رمضان اتلولۍ جام په نوم د ۵۰ ورزشکارانو ترمنځ د کیوکوشن کراټې ماتسو سبک سیالۍ ترسره شوې.
په دغو سیالیو کې د کابل او کاپیسا ولایتونو ورزشکارانو په بېلا بېلو وزنونو کې د تک فایټ په ډول سیالۍ ترسره کړې، چې په پایله کې د کاپيسا ولایت ورزشکارانو د زیاتو امتیازونو په ترلاسه کولو سره لومړی مقام ترلاسه کړ.
د یادو سیالیو موخه د کراټې ورزش ته وده ورکول او د ځوانانو ترمنځ یووالی رامنځته کول و، چې یوه ورځ یې دوام وکړ.
د سیالیو په پای کې د ورزش مسوولینو له لوري غوره ورزشکارانو ته مډالونه او د اتلولۍ حکمونه ورکړل شول
