کاپیسا؛ اتحاد چهار قوم لوبډلې د اله ساى ولسوالۍ د کرکټ لس اوره ټېپ بال سياليو اتلولي وګټله
د کاپیسا ولایت د بدني روزنې او ورزش امريت له لوري د اله ساى ولسوالۍ په ورزشي ميدان کې د اله ساى ولسوالۍ د شاو خوا سيمو د اووه لوبډلو په ګډون د کرکټ ټېپ بال لس اوريزې سيالۍ د اتحاد چهار قوم لوبډلې په اتلولۍ سره پاى ته ورسېدې.
دغو سياليو چې يوه مياشت يې دوام وکړ په پايلوبه کې يې د اتلان مرکزي او اتحاد چهار قوم لوبډلې سره ولوبېدلې، د لوبې پچه د اتلان مرکزي لوبډلې وګټله چې په ټاکلو لسو اورونو کې يې مقابلې لوبډلې ته ١١٩ منډې هدف ورکړ.
په مقابل کې د اتحاد چهار قوم لوبډلې ورکړل شوى هدف د لوبې په ٩.٤ اور کې پوره کړ او د دې سياليو اتلولي يې خپله کړه.
د دې سياليو موخه د کرکټ ټېپ بال وده او پراختيا، ورزش ته د ځوانانو هڅول او د کاپیسا ولایت اله ساى ولسوالۍ د کرکټ ټېپ بال لوبډلې ته د غوره ورزشکارانو ټاکل دي.
