کاپيسا؛ شاهين لوبډلې د آلاسای ولسوالۍ د فوټبال سياليو اتلولي وگټله
د کاپيسا ولايت د بدني روزنې او سپورټ آمريت اړوند د فوټبال فدراسيون د استازولۍ له لوري د آلاسای ولسوالۍ په ورزشي ميدان کې د ۱۲ لوبډلو ترمنځ د " دوستۍ جام" په نوم د فوټبال گروپي سيالۍ د شاهين لوبډلې په اتلولۍ پای ته ورسېدې.
د يادو سياليو پايلوبه د شاهين او السای ځوانانو لوبډلو ترمنځ ترسره شوه، چې په پايله کې شاهين لوبډلې خپلې سيالې لوبډلې ته ۲/۳ گولونو په توپير ماتې ورکړه او اتلولي يې خپله کړه.
د دغو سياليو د ترسره کېدو موخه د ځوانانو ترمنځ يووالی و، چې يوه مياشت يې دوام وکړ او په پای کې د ياد ولايت ورزش امريت له لوري اتلې لوبډلې ته د اتلولۍ جام او غوره لوبغاړو ته بېلابېلې چمتو شوې ډالۍ ورکړل شوې.
