کابل کې شاوخوا ۱۵۰ ورزشکارانو ته د پاورلفټينگ روزنيز سيمنار ورکړل شو
د المپيک، بدني روزنې او ورزش عمومي ریاست اړوند د پاورلفټينګ ملي فدراسیون له لوري د ملي لوبډلې د ټاکنيزو سياليو په درشل کې د هېواد له ۱۴ ولايتونو څخه شاوخوا ۱۵۰ ورزشکارانو ته د پاورلفټينگ په برخه کې يو ورځنی نظري او عملي روزنيز سيمنار ورکړل شو.
په دغه روزنيز سيمنار کې ورزشکارانو ته د پاورلفټينگ د بنسټيزو او مسلکي اصولو، د تخنيکونو د ښهوالي، د وزن پورته کولو د طريقو او د سياليو پر مهال د اړينو سپورتي اصولو په اړه هر اړخيز معلومات وړاندې شول.
همدارنگه د سيمنار په عملي برخه کې ورزشکارانو ته د پاورلفټينګ د بېلابېلو حرکتونو د سم اجرا، د بدن د وضعيت، د وزن د کنټرول او د خوندي تمرين کولو عملي لارښوونې ورکړل شوې، څو ورزشکاران وکولای شي د سياليو پر مهال خپل مهارتونه په مسلکي او معیاري ډول وکاروي.
ټاکل شوې ده، چې سبا یکشنبه د هېواد ورزش ادارې په ۵۰۰ کسيز جمنازيوم کې د پاورلفټينگ ملي لوبډلې د ټاکلو په موخه ټاکنيزې سيالۍ پيل شي.
