کابل کې د ۸۰ ورزشکارانو ترمنځ د پانکريشن يولسمې دورې ټاکنيزې سيالۍ پيل شوې
د المپيک، بدني روزنې او ورزش عمومي رياست اړوند د پانکريشن فدراسيون له لوري د ياد رياست په ۲٫۵۰۰ کسيز جمنازيوم کې د ۱۴ کلبونو د ۸۰ ورزشکارانو ترمنځ د کابل منتخبې لوبډلې ته د غوره لوبغاړو ټاکلو په موخه د پانکريشن يولسمې دورې ټاکنيزې سيالۍ پيل شوې، چې دوې ورځې به دوام وکړي.
د پانکريشن فدراسيون مسؤلينو په وينا دغه سیالۍ به په ځوانانو، نويو ځوانانو او مشرانو عمري کټگوريو کې ترسره شي، چې په پايله کې به ۴۰ غوره ورزشکاران د کابل منتخبې لوبډلې ته وټاکل شي.
