کابل کې د ۳۵۰ پهلوانانو ترمنځ د نويو ځوانانو او ځوانانو د پهلوانۍ ملي ټاکنیزې سیالۍ پيل شوې
د المپیک کمېټې، بدني روزنې او ورزش عمومي ریاست اړوند د پهلوانۍ فدراسیون له لوري د یاد ریاست په ۲۵۰۰ کسیز جمنازیوم کې له پنځلسو ولایتونو د ۳۵۰ پهلوانانو ترمنځ د نويو ځوانانو او ځوانانو د پهلوانۍ ملي ټاکنیزې سیالۍ پيل شوې.
دغه سیالۍ به د نویو ځوانانو او د ځوانانو په عمري کټګوریو کې ترسره شي، چې په پایله کې به ۴۰ پهلوانان د نویو ځوانانو د پهلوانۍ ملي لوبډلې ته او ۴۰ پهلوانان د ځوانانو پهلوانۍ ملي لوبډلې ته، چې ټول ۸۰ تنه پهلوانان کېږي ملي لوبډلو ته وټاکل شي.
د دغو سیالیو پرانیستغونډې ته د المپیک کمېټې، بدني روزنې او ورزش عمومي ریاست ورزشي مشاور او د پهلوانۍ ملي فدراسیون سرپرست ریئس قاري حیات الله رحماني، د پهلوانۍ فدراسیون د ولایتونو استازي، تجربه لرونکو پهلوانان، ورزشکاران او زیات شمېر مینوال راغلي وو.
د یادو سیالیو موخه د نویو ځوانانو او ځوانانو د پهلوانۍ ملي لوبډلو ته د غوره پهلوانانو موندل دي، چې پنځه ورځې به دوام وکړي.
