کابل کې د ۱۸۰ ورزشکارانو ترمنځ د کيک بوکسينګ ملي ټاکنيزې سيالۍ پای ته ورسېدې
د المپيک، بدني روزنې او ورزش عمومي رياست اړوند د کيک بوکسينګ ملي فدراسيون له لوري د هېواد له ۳۱ ولايتونو څخه د ۱۸۰ ورزشکارانو ترمنځ، د دې رياست په ۲۵۰۰ کسيز ورزشي جمنازيوم کې پيل شوې، د کيک بوکسينګ دوولسم پړاو ملي ټاکنيزې سيالۍ، ملي لوبډلې ته د ۳۳ لوبغاړو پر ټاکلو پای ته ورسېدې.
د دې سياليو د پای مراسم، چې د هېواد د المپيک کميټې د غونډو په تالار کې جوړ شوی و، پکې د هېواد ورزش ادارې فني او مسلکي مرستيال حافظ احمد جان ځدراڼ، د دفتر رئيس فضل الرحمان بري، فني او مسلکي رئيس حميدالله صافي، د کيک بوکسينګ ملي فدراسیون رئیس شير محمد هاشمي، ورزشي مسوولينو او ورزشکارانو ګډون کړی وو.
دغه سيالۍ، چې د ۵۱ کيلو ګرامه پورته په ازاد وزن کې ترسره شوې، په پايله کې يې کابل ولايت په ټيمي ډول لومړی مقام، هرات دويم او فارياب بیا درېيم مقام ترلاسه کړ.
همدارنګه قدرت الله له کابل څخه لومړی مقام، صبغت الله له بادغيس څخه دويم مقام او ساجد له خوست ولايت څخه درېيم مقام وګاټه، چې د مسوولينو له لوري ورته مډالونه او ستاينليکونه ورکړل شول.
د ويلو ده، چې يادې سيالۍ د کيک بوکسينګ ملي لوبډلې ته د غوره څېرو موندلو په موخه پيل شوې وې.
