کابل کې د ۱۴۰ ورزشکارانو ترمنځ د کونګ فو اتلولۍ سيالۍ وشوې
د کابل ولايت د بدني روزنې او ورزش رياست په همکارۍ د کونګ فو ملي فدراسیون له لوري د کابل ولايت د ۲۵ کلبونو څخه د ۱۴۰ ورزشکارانو ترمنځ، په درې عمري کټګوريو( نوي ځوانانو، ځوانانو او لويانو ) کې د دې رياست په ۵۰۰ کسيز جمنازيم کې «د استعدادونو د ودې جام» په نوم د کونګ فو اتلولۍ سيالۍ وشوې.
د دې سياليو د پيل په مراسمو کې د هېواد د المپيک، بدني روزنې او ورزش عمومي رياست، فني او مسلکي مرستيال حافظ احمد جان ځدراڼ، د کابل ولايت د بدني روزنې او ورزش رياست رييس مولوي عتيق الله خالد، ورزشي مسوولينو، ورزشکارانو او ګڼ شمير د کونګ فو ورزش مينوالو ګډون کړی وو.
په دې سياليو کې ۱۴۰ ورزشکارانو د کونګ فو په بازمايانا سبک کې د يو بل پر وړاندې سيالۍ ترسره کړې، چې په پايله کې يې ۷۰ ورزشکارانو خپلو سيالانو ته ماتې ورکړې او د کونګ فو فدراسيون د مسولينو له لوري ورته مډالونه او ستاينليکونه ورکړل شول.
هېره دې نه وي، چې يادې سيالۍ د کونګ فو ورزش د ورزشکارانو، د هڅونې او ودې لپاره پيل شوې وې، چې يوه ورځ يې دوام وکړ.
