کابل کې د هېواد ورزش ادارې د رهبري له لوري د سوک وهنې دوه مډال راوړونکي ورزشکاران وستایل
د المپیک، بدني روزنې او ورزش عمومي ریاست د رهبرې له لوري د کابل ښار د سوک وهنې د نویو ځوانانو د ټاکنیزو سیالیو ترڅنګ د سوک وهنې (پوریای ولي جام) په نړۍوالو سیالیو کې دوه مډال راوړونکي ورزشکاران وستایل شول.
دغه ستاینغونډه د المپیک، بدني روزنې او ورزش عمومي ریاست فني او مسلکي مرستیال حافظ احمدجان ځدارڼ په حضور کې ترسره شوه، چې په کې هغه دوه د برنزو مډال راوړونکي ورزشکاران په ډالیو وستایل شول، چې په خپلو وروستیو لوبو کې ایراني سیالانو ته ماتې ورکړې وه.
د پوریای ولي جام په نوم د سوک وهنې دغه نړۍوالۍ سیالۍ د نړۍ اتو هېوادونو ورزشکارانو ترمنځ د روان میلادي کال په ۲۶ نېټه پیل شوې وې او د مې میاشتې تر درېیمې نېټې پورې دوام وکړ، چې له افغانستان څخه پکې اووه ورزشکارانو ګډون کړی و.
د ستاینغونډې دغه مراسم د سوک وهنې ملي فدارسیون د رهبري غړو، د ملي لوبډلو ورزشکارانو او د ورزش ادارې د مسؤلینو په حضور کې ترسره شول، چې د ورزش مسؤلینو له لوري د یادو ورزشکارانو هڅې وستایلې شوې او د ځوانو استعدادونو پر لا زیات ملاتړ یې ټینګار وکړ.
