کابل کې د زورخانه يي غېږ نيونې ټاکنيزې سيالۍ د ۴۰ غوره ورزشکارانو په ټاکلو سره پای ته ورسېدې
د کابل ولايت د بدني روزنې او ورزش رياست اړوند د زور خانه يي ورزشونو، غېږنيونې او پهلوانۍ ملي فدراسيون له لوري د کابل ښار له ۱۶ کلبونو څخه د ۲۰۰ ورزشکارانو ترمنځ د زور خانه يي غېږنيونې ټاکنيزې سيالۍ پای ته ورسېدې.
دغه سيالۍ درې ورځې وړاندې د دوو عمري کټګوريو نويو ځوانانو او ځوانانو په بېلابېلو وزنونو کې پيل شوې وې، چې په پايله کې يې ۲۰ تنه د ځوانانو له کټګورۍ او ۲۰ تنه د نويو ځوانانو له کټګورۍ د کابل ولايت د زور خانه يي غېږنيونې منتخبې لوبډلې ته وټاکل شول.
د يادونې وړ ده، چې د دغه سياليو د پای په مراسمو کې د هېواد د ورزش ادارې فني او مسلکي مرستيال حافظ احمد جان ځدراڼ، د دې فدراسيون رئيس مصطفی نورستاني، ورزشي مسوولينو او ګڼ شمير د پهلوانۍ مينوالو ګډون کړی و.
