کابل کې د اتو لوبډلو ترمنځ د ویلچر باسکټبال ب ګروپ سیالۍ د میمنې لوبډلې په اتلولي پای ته ورسېدې
د ویلچر باسکټبال ب ګروپ سیالۍ چې شپږ ورځې مخکې په کابل کې د بدني روزنې او ورزش ریاست په همغږي او د سره صلیب او نوه انلوس بنسټ په مالي ملاتړ د اتو لوبډلو ترمنځ پیل شوې وې، د میمنې لوبډلې په اتلولي پای ته ورسېدې.
د یادو سیالیو پایلوبه د کابل ب او میمنې لوبډلو ترمنځ ترسره شوه، چې په پایله کې یې میمنې لوبډلې د ۱۵/۴۵ نمرو په توپیر خپلې سیالې لوبډلې ته ماتې ورکړه او اتلولي یې په خپل نوم کړه.
همداراز په دغو سیالیو کې کابل ب لوبډلې دویم، کندهار درېیم او بامیان څلورم مقام ترلاسه کړ.
د دغو سیالیو د پای په مراسمو کې د بدني روزنې او ورزش ریاست فني او مسلکي مرستیال حافظ احمد جان ځدراڼ، د المپیک ملي کمېټې اجرائیه رئیس داد محمد پاینده اختري، دالمپیک ملي کمېټې لومړي مرستیال باور خان هوتک، د پارا المپیک رهبري پلاوي، د سره صلیب ورزشي پلاوي، د نوه انلوس بنسټ مشر، ورزشکارانو او د ورزش مینوالو ګډون کړی و.
د یادونې وړ ده، چې د دغو سیالیو اتله لوبډله به د ویلچر باسکټبال غوره لیګ سیالیو کې چې یوه میاشت وروسته به په هرات ولایت کې ترسره شي، وټاکل شي.
د مسؤولانو په خبره، یادې سیالې د ویلچر باسکټبال غوره لیګ سیالیو ته د لوبډلې ټاکلو او د ورزش کارانو د ظرفیت لوړولو په موخه ترسره شوې چې په پای کې د مسؤولانو له لوري ټولو ورزش کارانو ته کپونه، مډالونه او نورې ډالۍ ورکړل شوې.
