کابل؛ په غازي سټوډیوم کې د ۶ لوبډلو ترمنځ د رګبي یو ورځنۍ خزاني سیالۍ ترسره شوې
د پلازمېنې کابل په غازي سټوډيوم کې د شپږو لوبډلو ترمنځ د رګبي لوبې یو ورځنۍ سیالۍ د درېیو لوبډلو خراسان، آریانا او افغان کېنګ په بریا پای ته ورسېدې.
د رګبي په دغو سیالیو کې د کابل ولایت شپږو ټیمونو "خراسان، کابل یونایټیډ، حبیبه لېسې، افغان کېنګ، آریانا او مموزی یوت رګبي" لوبډلو ګډون درلود.
په سیالیو کې د المپیک ملي کمېټې او سپورټ عمومي رياست پر مسوولینو سربېره، د رګبي فدراسیون غړو او یو شمېر ورزشکارانو برخه لرله.
د رګبي فدراسیون غړي استاد صفي الله احمدي غوښتنه وکړه، چې د بدني روزنې او ورزش عمومي ریاست دې د دوی شته ستونزې، چې د معیاري لوبغالي نشتوالي، د زیاتو ټورنمنټونو نه ترسره کولو، مالي ملاتړ او د ولایتي ټیمونو د نه لرلو په برخه کې یې لري، پاملرنه ورته وشي.
د یادونې ده، چې په پلازمېنه کابل کې د رګبي لوبډلې ۱۰ ټیمونه شته، چې له ډلې یې نن سه شنبه ۶ لوبډلو سیالۍ ترسره کړې.
