کابل؛ د ۱۵ ولایتونو د ۹۰ ورزشکارانو ترمنځ د جودو ملي فدراسیون سیالۍ پای ته ورسېدې
د هېواد المپيک ملي کمېټې او د بدني روزنې او ورزش عمومي ریاست اړوند د جودو ملي فدراسیون له لوري د یاد ریاست په ۵۰۰ کسیز جمنازیوم کې د کابل په کوربتوب له ۱۵ ولایتونو د ۹۰ ورزشکارانو ترمنځ د ۶۰، ۶۶، او ۷۳ کیلو ګرام په وزني کټګوریو کې د جودو ملي فدراسیون سیالۍ پای ته ورسېدې.
په پایله کې ۶۰ کیلوګرام وزني کټګورۍ څخه خیام له کابل لومړی، سید کمال الدین له تخار دویم او حامد هم له تخار درېیم مقام ترلاسه کړ، د ۶۶ کیلوګرام په وزني کټګورۍ کې سید احمد له تخار ولایت څخه لومړی، رحیم الله له تخار ولایت څخه دویم او قاري جاوید له تخار ولایت څخه درېیم مقام ترلاسه کړ او د ۷۳ کیلو ګرام په وزني کټګورۍ کې رشاد ارین له تخار څخه ولایت لومړی، صدرالدین له تخار ولایت څخه دویم مقام او مطیع الله له بلخ ولایت څخه درېیم مقام ترلاسه کړ.
د دغو سیالیو د پای په مراسمو کې د هېواد المپيک ملي کمېټې او د بدني روزنې او ورزش عمومي ریاست عمومي رییس مولوي احمدالله وثیق، د هېواد المپيک ملي کمېټې او د بدني روزنې او ورزش عمومي ریاست فني او مسلکي معاون حافظ احمدجان ځدراڼ، د المپيک ملي کمېټې اجراییه رییس داد محمد پاینده اختري، د المپيک ملي کمېټې معاون باور هوتک، د یاد ریاست د نشراتو رییس اتل مشواڼي، د جودو ملي فدراسیون رهبري پلاوي، ورزشکارانو او زیات شمېر مینوالو ګډون کړی وو.
په دغومراسمو کې د هېواد المپيک ملي کمېټې او د بدني روزنې او ورزش عمومي ریاست عمومي رییس مولوي احمدالله وثیق د جودو له ملي فدراسیون مننه وکړه او زیاته یې کړه: د افغانستان د ورزش اداره د ورزشکارانو د ملاتړ او د هېواد د ورزش ودې لپاره په برخه کې له تاسو سره هر ډول خدمت کوي او ان شاءالله موږ کوښښ کوو ترڅو په ټول هېواد کې ورزش ته وده ورکړو.
همدارنګه ښاغلي وثیق وویل: موږ د ورزش په برخه کې وروستیو کلونو کې بې سارې لاسته راوړنې درلودې او افغان ورزشکاران به په راتلونکو کې په لویو ورزشي برنامو کې ګډون وکړي.
د یادو سیالیو موخه د جودو سیالیو ته وده ورکول او د ځوانانو هڅوول و.
د سیالیو په پای کې غوره لوبغاړو ته کپ، مډالونه، اتلولۍ حکم، ډالۍ او یوه اندازه پیسې ورکړل شوې.
