کابل؛ د هېواد ورزش ادارې کارکوونکو ته د ملکي خدمتونو انسټيټوټ له لوري د زده کړه ییزې اړتیا سنجونې يو ورځنی سمینار ترسره شو
کابل کې د المپیک، بدني روزنې او ورزش عمومي ریاست، رئيسانو، امرينو او مديرانو ته د هېواد د چارو ادارې د چتر لاندې د اصلاحات اداري او ملکي خدمتونو رياست، د ملکي خدمتونو انسټیټوټ له لوري د زده کړه ییزې اړتیا سنجونې او د اداري مهارتونو او معلوماتو ښوونیز سمینار ترسره شو.
په دغه سمینار کې د ملکي خدمتونو انسټیټوټ کار پوه سميع الله معاويه د هېواد ورزش ادارې کارکوونکو ته د اړتيا سنجونې پر مفهوم او اهميت او دغه راز د کورسونو او ښوونیزو برنامو د ترسراوي پر تګلاره خبرې وکړې.
د ياد سمینار په پيل کې د المپیک، بدني روزنې او ورزش عمومي رياست، د دعوت او ارشاد رياست رئيس مفتي داد محمد بريال عطايي، ټولو راغلو ميلمنو او کارکوونکو ته ښه راغلاست وويل او د ياد انسټیټیوټ له لورې يې وړاندې کېدونکي برنامې مؤثرې وبللې.
همدارنګه د ملکي خدمتونو انسټیټیوټ مرستيال انجنير ويس الدين ويس وويل: د ملکي خدمتونو انسټیټیوټ د ټول نظام په کچه فعاليت کوي، ترڅو د کارمندانو ستونزې لومړی په نښه او د حل لپاره يې لازمې کړنې او برنامې ترسره کړي.
دغه راز نوموړې زياته کړه، چې موږ د کارمندانو د ستونزو د حل او مسلکي وړتيا د زياتوالي لپاره په خپل انسټیټیوټ کې درې ډوله برنامې پر مخ وړو، لومړی په داخل د انسټیټیوټ کې، دويم په ولايتونو کې او درېيم د ځانګړي صنف جوړونې په بڼه.
هېره دې نه وي، چې ياد سمينار هر کال د ملکي خدمتونو د انسټیټیوټ له لوري ترسره کېږي، تر څو د کارکوونکو د اړتيا وړ برنامې او اړتياوې په نښه کړي او د حل لپاره يې اړين اقدامات او برنامې جوړې کړي.
