کابل؛ د هېواد ورزش ادارې د رستمي غېږنيونې په نړيوالو سياليو کې د سرو زرو مډال ګټونکی ورزشکار وستايه
د المپيک، بدني روزنې او ورزش عمومي رياست د رهبرۍ له لوري له ۱۸ کلنو کم عمره ځوانانو د رستمي غېږنيونې نړيوالو او اسيايي سياليو کې د سرو زرو مډال ګټونکی ورزشکار محمد عمر عزيزي، د يوې ځانګړې غونډې په ترڅ کې وستايه.
دغې ستاينغونډه کې د هېواد ورزش ادارې فني او مسلکي مرستيال حافظ احمد جان ځدراڼ، د المپيکي چارو رئيس داد محمد پاينده اختري ، د فوټبال ملي فدراسیون رئيس محمد يوسف کارګر، د نشراتو رئيس اتل مشواڼي، د کورش ملي فدراسيون رئيس سید محمود ضياء دشتي، ورزشي مسوولينو او مډال راوړونکي ورزشکار ترڅنګ د فوټبال نړيوال سند ترلاسه کوونکو لوبڅارانو ګډون کړی و.
په یاده غونډه کې، د المپيک بدني روزنې او ورزش عمومي رياست فني او مسلکي مرستيال ښاغلي حافظ احمد جان ځدراڼ د سرو زرو مډال راوړونکي ورزشکار ته د دې تاريخي مډال مبارکۍ ترڅنګ وويل، د ا.ا.ا په راتګ سره ورزش زيات پرمختګ کړی دی او ورزشکارانو په بېلابېلو برخو کې زيات شمېر وياړونه هېواد ته راوړي دي.
دغه راز نوموړي زياته کړه، چې دغه ټول وياړنه د يو کلک هوډ او ملاتړ پايله ده، چې ا.ا.ا امارت او د هېواد ورزش اداره يې له خپلو ورزشکارانو څخه کوي.
په دې ستاينغونډه کې د ازبکستان په کوربتوب د رستمي غېږنيونې نړيوالو سياليو کې د سرو زرو مډال ګټونکي ترڅنګ د فوټبال ملي فدراسیون هغه پنځه تنه لوبڅاران هم وستايل شول ، چې تازه يې له فيفا څخه د نړيوالو سياليو د لوبڅارۍ سندونه ترلاسه کړي وو.
له دغو لوبڅارانو څخه درې تنو ( محمد اشرف حسن زاده، جليل احمد جامي او شفیق الله حبيبي ) د فوټبال لوبڅارۍ، محمد سخي صديقي د ساحلي فوټبال لوبڅارۍ او عتيق الله نيازي د فوټسال لوبڅارۍ نړيوال سندونه ترلاسه کړي وو.
د يادونې وړ ده، چې د کورش د ځوانانو د رستمي غېږنيونې نړيوالې او اسيايي سيالۍ د ازبکستان په کوربتوب د دې هېواد نکوس ښار کې د ۲۲ هېوادونو ترمنځ د روانې غبرګولي مياشتې له ۷مې تر ۱۰مې نېټې ترسره شوې، چې افغان ورزشکارانو پکې يو د سروزرو، دوه د سپينو زرو او دوه د برنزو مډالونه وګټل.
