کابل؛ د هاکي فدراسيون ۴۵ روزونکو ته د ظرفيت لوړونې لومړی درجه نړیوال روزنيز کورس پيل شو

د المپيک، بدني روزنې او ورزش عمومي رياست اړوند د هاکي ملي فدراسيون له لوري د هېواد له ۸ ولايتونو څخه ۴۵ روزونکو ته د هاکي نړیوال فدراسیون د ظرفيت لوړونې لومړی درجه روزنيز کورس د المپيک ملي کمېټې د غونډو په تالار کې پيل شو.

په دې کورس کې به د هاکي نړیوال فدراسيون پاکستاني روزونکي زاهد علي له لوري د هاکي لوبې نوي اصول، فني او مسلکي مهارتونه، د روزنې بېلابېل مهارتونه، د روزونکو او لوبغاړو د تيارولو مهارتونه او د هاکي سياليو په اړه موضوعات په نظري او عملي بڼه تدريس شي.

د ويلو ده، چې ياد کورس، په افغانستان کې د هاکي لوبې د پرمختګ او د روزونکو د ظرفيت لوړونې په موخه، د هاکي نړیوال فدراسیون روزونکي زاهد علي، د هاکي ملي فدراسيون رئیس عبدالله نورستاني او د دې فدراسيون روزونکو په شتون کې پيل شو، چې څلور ورځې به دوام وکړي.