کابل؛ د موټرسایکل ځغلوونې ملي فدراسیون ۱۸ کسېزه لوبډله د موټرسایکل ځغلوونې نړیوالو سیالیو کې د ګډون په موخه پاکستان ته روانه شوه
د بدني روزنې او ورزش عمومي ریاست له لوري د موټرسایکل ځغلوونې ملي فدراسیون ۱۸ کسېزه لوبډله د موټرسایکل ځغلونې نړیوالو سیالیو کې د ګډون په موخه پاکستان هېواد ته روانه شوه
دغه سیالۍ چې پینځه ورځې به دوام وکړي د څلورو هیوادونو د لوبډلو افغانستان، پاکستان، ایران او سعودي عربستان ترمنځ به د پاکستان د لاهور ښار په کوربتوب سبا ورځ د کراس او کوهستان په سبک کې پیل شي.
د خدای پامانۍ په دغو مراسمو کې د بدني روزنې او ورزش عمومي ریاست فني او مسلکي معاون حافظ احمد جان ځدراڼ، د موټر ځغلوونې ملي فدراسیون مشرتابه پلاوي او د موټرسایکل ځغلوونې ورزشکارانو ګډون کړی و.
په همدغه وخت کې د المپیک ملي کمېټې او ورزش عمومي رییس مولوي احمدالله وثیق په ټیلفوني اړیکه کې یادې لوبډلې سره د خدای پاماني ترڅنګ هغوی ته د ښو لاسته راوړنو هیله درلوده.
په پای کې د بدني روزنې او ورزش عمومي ریاست فني او مسلکي معاون حافظ احمد جان ځدراڼ دغو ورزشکارانو ته بریا غوښتونکی و او هغوی ته د لازمو لارښوونو سربېره د خیر دعا وکړه.
