کابل؛ د شپږ ولایتونو ترمنځ د ويلچر باسکټبال سيالۍ د پروان لوبډلې وګټلې
د کابل ولايت په کوربتوب د شپږو ولايتونو لغمان، پروان، ميدان وردګ، باميان، کندهار او کابل "ب" لوبډلو ترمنځ د ويلچر باسکټبال سيالۍ د پروان ولايت د لوبډلې په ګټلو پاى ته ورسېدې.
د دغو سياليو فاينل ته د پروان او کندهار ولایتونو لوبډلو لار وموندله، چې د پروان لوبډلې خپلې سيالې لوبډلې ته د ٣٥-٢٠ په توپیر ماتې ورکړه او د دې سياليو اتلولي يې خپله کړه.
همداراز په دې سياليو کې د کندهار لوبډلې دويم، ميدان وردګ درېيم او د باميان ولایت لوبډلې څلورم مقام ترلاسه کړ.
يادي سيالۍ چې د سره صليب نړيوالې کمېټې په مالي لګښت د همدې کمېټې په ورزشي جمنازيوم درې ورځې وړاندې پيل شوې موخه يې د ځوانانو ورزشکارانو هڅول او د غوره استعدادونو موندل دي.
