کابل؛ د شپږ لوبډلو ترمنځ د رسۍ کشولو دوديزې سيالۍ ترسره شوې
د بدني روزنې او ورزش ریاست په غازي سټډيوم کې د ملي، محلي او دوديزو سياليو د پراختيا امريت له لوري په لومړي ځل د شپږ لوبډلو ٣٠ تنو ورزشکارانو ترمنځ د رسۍ کشولو دوديزې سيالۍ ترسره شوې.
د دغو سياليو د پيل په مراسمو کې د المپیک ملي کمېټې او سپورټ عمومي رئيس مولوي احمدالله وثيق، د بدني روزنې او ورزش عمومي ریاست فني او مسلکي مرستيال حافظ احمد جان ځدراڼ، د فدراسيونونو استازو او ورزشکارانو ګډون درلود.
په پيل کې د المپیک ملي کمېټې او سپورټ عمومي رئيس مولوي احمدالله وثيق خبرې وکړې نوموړي وويل؛ دا مهال د نورو ورزشونو ترڅنګ ملي، محلي او دوديز ورزشونو هم د پرمختګ په حال کې دي او وخت ناوخت په بېلابېلو ولایتونو کې د محلي دوديزو ورزشونو سيالۍ ترسره کيږي.
ښاغلي وثيق ډاډ ورکړ، چې ملي، محلي او دوديزو ورزشونو ته به هم پاملرنه کوي او د پرمختګ لپاره به يې هڅې کوي.
په دغو سياليو د قهرمان خراسان، شيراني خراسان، مهتاب خراسان، مرکزي خراسان، ياران خراسان او ببر خراسان لوبډلو برخه لرله.
يادو سياليو، چې يوه ورځ يې دوام وکړ د شيراني خراسان لوبډلې په لومړي، مرکزي خراسان لوبډلې دويم او د ياران خراسان او مهتاب خراسان مشرک درېيم مقام ګټلو سره پاى ته ورسېدې.
د دغو سياليو موخه د ملي، محلي او دوديزو ورزشونو وده ده.
