کابل؛ د رزمي لوبو د ملي فدراسیون ۱۱ تنه ورزشکاران هیواد ته له دویم مقام ګټلو سره راستانه شول
د هیواد د ورزش ادارې په همغږۍ د رزمي لوبو د ملي فدراسیون ۱۱ تنه ورزشکاران، چې لس ورځې وړاندې د اوور آسیا په نړیوالو سیالیو کې د ګډون په تکل ایران ته تللي وو، نن له دویم مقام ګټلو سره بېرته راستانه شول او د هېواد د ورزش ادارې له لوري وستایل شول.
په دغو مراسمو کې د بدني روزنې او سپورټ عمومي ریاست فني او تخنیکي مرستیال حافظ احمد جان ځدراڼ، د المپیک ملي کمېټې اجراییه رئیس داد محمد پاینده اختري، د بدني روزنې او سپورټ عمومي ریاست د ورزشي چارو سلاکار قاري حیات الله رحماني، مشورتي بورډ، د رزمي سیالیو د فدراسیون مسوولینو او ورزشکارانو ګډون کړی وو.
په غونډه کې د المپیک ملي کمېټې اجراییه رئیس داد محمد پاینده اختري راستنېدونکو ورزشکارانو ته ښه راغلاست او د بریاوو مبارکي وویله او زیاته یې کړه : " الحمدلله په تېرو دوو کلونو کې نه یوازې په رزمي لوبو کې ښې لاسته راوړنې لرو؛ بلکې زموږ ادارې پورې اړوند هر ډول ورزش وده کړې. دا په داسې حال کې، چې موږ په ډېرو کمو مالي امکاناتو سره او د ورزشکارانو له زیاتو مشکلاتو سره بیا هم توانیدلي یوو، چې ښې لاسته راوړنې ولرو او دا زموږ لپاره د افتخار خبره ده."
د اوور اسیا په دغو سیالیو کې د افغانستان دوو لوبډلو د افغانستان ب او د افغانستان د مهاجرو لوبډلې په ګډون د ۱۱ هیوادونو ترمنځ د (کې ون کیک بوکسېنګ، واک کو کیک بوکسېنګ او فول کانټک کیک بوکسېنګ) په سبکونو کې د ایران په کوربتوب رزمي سیالۍ ترسره شوې.
په پایله کې ایران لومړی مقام، افغانستان دویم مقام، او عراق درېیم مقام ترلاسه کړ.
په دغو رزمي سیالیو کې د افغانستان ب لوبډلې درې د سرو زرو کمربندونو او پنځه د سپینو زرو مډالونو په ترلاسه کولو سره هېواد ته راستنه شوه او د افغانستان مهاجرو لوبډلې درې د سرو زرو کمربندونه او اته د سپینو زرو مډالونه وګټل.
