کابل؛ د " اينده سازان جام " په نوم د کونګفو لومړى پړاو سيالۍ ترسره شوې
په کابل کې د بدني روزنې او ورزش عمومي ریاست په ٥٠٠ کسيز ورزشي جمنازيوم کې د اينده سازان جام په نوم د کونګفو لومړى پړاو سيالۍ ترسره شوې.
په دغو سياليو کې د بدني روزنې او ورزش عمومي ریاست فني او مسلکي مرستيال حافظ احمد جان ځدراڼ، د فدراسيونونو امر محمد اعظم کوهي، د سياليو دايرولو امر عزيز الرحمن ملنګ، د زده کړو امر حميد الله صافي، د کونګفو فدراسیون مسوولينو، ورزشکارانو او د دې رشتې مينوالو شتون درلود.
په دغو سياليو کې د کابل ښار د کونګفو شپږ انجمنونو د کوچنيانو او نوي ځوانانو سني کټګوريو ١١٠ ورزشکاران له يوبل سره ولوبېدل.
د دغو سياليو موخه په يادو دوو کټګوريو کې د ورزشکارانو ظرفيت لوړول او استعداد موندنه ده.
يادو سياليو، چې يوه ورځ يې دوام وکړ، په پاى کې يې ګټونکو ورزشکارانو ته مډالونه او تقديرنامې ورکړل شوې.
