کابل؛ د استالف والیبال خزاني سیالۍ د استالف ځوانانو لوبډلې په اتلولي پای ته ورسېدې
د استالف ولسوالۍ د والیبال خزاني سیالۍ د استالف ځوانانو په اتلولي پای ته ورسېدې.
د دغو سیالیو وروستی پړاو دوه اوونۍ وړاندې پیل شوی و، چې د تېرې جمعې په ورځ د استالف ځوانانو په اتلولي پای ته ورسېدې.
د نوموړیو سیالیو پایلوبه د استالف ځوانان او ګلستان لوبډلو ترمنځ وشوه، چې د استالف ځوانانو لوبډلې د ۳-۱ میدانونو په توپیر ګلستان لوبډلې ته ماتې ورکړه.
د یادونې وړ ده، چې په دغو سیالیو کې له بېلابېلو کليو څخه ۸ لوبدلو ګډون کړی و.
د سیالیو په پای کې اتلې لوبډلې ته کپ او دویم او درېیم مقام ته ستاینلیکونه ورکړل شول.
